И҆зведѝ и҆з̾ темни́цы дш҃ꙋ мою̀,* и҆сповѣ́датисѧ и҆мени твоемꙋ̀.
Вече́рнюю пѣ́снь, и҆ слове́снꙋю слꙋ́жбꙋ, тебѣ̀ хрⷭ҇тѐ прино́симъ, ꙗ҆́кѡ бл҃говоли́лъ є҆сѝ поми́ловати на́съ, воскрⷭ҇нїѧ ра́ди.
Менѐ ждꙋ́тъ пра́ведницы,* до́ндеже возда́си мнѣ.
Гдⷭ҇и гдⷭ҇и, не ѿве́рзи на́съ ѿ твоегѡ̀ лица̀, но бл҃говолѝ поми́ловати на́съ, воскрⷭ҇нїѧ ра́ди. 
И҆з̾ глꙋбины̀ возва́хъ к̾ тебѣ гдⷭ҇и,* гдⷭ҇и оу҆слы́ши гла́съ мо́й.
Ра́дꙋисѧ сїѡ́не ст҃ы́и, мт҃и цр҃квамъ, бж҃їе жили́ще. ты́ бо прїѧ́тъ пре́жде ѡ҆ставле́нїе грѣхѡ́въ, воскрⷭ҇нїѧ ра́ди. и҆́ны, стихѣ́ры. творе́нїе а҆нато́лїѧ патрїа́рха цр҃ѧ гра́да. запѣ́въ:

Сла́ва о҆ц҃ꙋ́ и҆ сн҃ꙋ и҆ ст҃о́мꙋ дх҃ꙋ, ꙳ и҆ ны́нѣ и҆ при́снѡ и҆ во́ вѣ́ки вѣкѡмъ, а҆ми́нь.
Цр҃ь нбⷭ҇ныи, за чл҃колю́бїе на землѝ ꙗ҆ви́сѧ, и҆ с̾ чл҃ки поживѐ. ѿ дв҃ы бо чи́стыѧ пло́ть прїе́мыи, и҆з̾ неѧ̀ проше́дъ с̾ воспрїѧ́тїемъ. є҆ди́нъ є҆́сть сн҃ъ сꙋгꙋ́бъ є҆стество́мъ а҆ несоста́вомъ. тѣ́мже соверше́на тогѡ̀ бг҃а, и҆ соверше́на чл҃ка, вои́стинꙋ проповѣ́дающе, и҆сповѣ́даемъ хрⷭ҇та̀ бг҃а на́шегѡ. є҆го́же молѝ, мт҃и без̾невѣ́стнаѧ, поми́ловатисѧ дш҃а́мъ на́шимъ.

Гдⷭ҇ь воцр҃и́сѧ, в̾ лѣ́потꙋсѧ ѡ҆блечѐ.
Хрⷭ҇та̀ славосло́вимъ воскрⷭ҇шагѡ и҆з̾ ме́ртвыхъ, дꙋ́шꙋ бо и҆ тѣ́ло воспрїе́мъ, стрⷭ҇ти ѿ ѡ҆бою́дꙋ ѿсѣчѐ. прест҃а́ѧ ᲂу҆́бѡ дш҃а во а҆́дъ соше́дши, є҆го́же и҆ плѣнѝ. во́ гробѣ же и҆стлѣ́нїѧ неви́дѣ ст҃о́е тѣ́ло, и҆зба́вителѧ дш҃а́мъ на́шимъ.
И҆бо оу҆твердѝ вселе́ннꙋю, ꙗ҆же не подви́житсѧ.
Ѱалмы̀ и҆ пѣ́сньми славосло́вимъ хрⷭ҇тѐ, є҆́же и҆з̾ ме́ртвыхъ твоѐ воскрⷭ҇нїе, и҆́мъ же на́съ свободи́лъ є҆сѝ мꙋчи́тельства а҆́дова. и҆ ꙗ҆́кѡ бг҃ъ дарова̀, живо́тъ вѣ́чныи и҆ ве́лїю ми́лость.
До́мꙋ твоемꙋ̀ подоба́етъ, ст҃ы́ни гдⷭ҇и в̾ долготꙋ̀ дні́й.
ѽ влⷣко всѧ́ческимъ, непости́жиме тво́рче не́бꙋ и҆ землѝ. крⷭ҇та̀ ра́ди и҆ стрⷭ҇те́й, мнѣ̀ без̾стра́стїе и҆сточи́лъ є҆сѝ. погребе́нїе же прїе́мъ, и҆ воскр҃съ во сла́вѣ, совоскр҃си́лъ є҆сѝ а҆да́ма рꙋко́ю всеси́льною. сла́ва твоемꙋ̀ тридне́вномꙋ воста́нїю, и҆́мже дарова̀ на́мъ вѣ́чныи живо́тъ, и҆ ѡ҆чище́нїе грѣхо́въ, ꙗ҆́кѡ є҆ди́нъ млрⷭ҇дъ.
Сла́ва о҆ц҃у́ и҆ сн҃у и҆ ст҃о́мꙋ дх҃ꙋ, и҆ ны́нѣ и҆ при́снѡ и҆ во́ вѣ́ки вѣкѡмъ, а҆ми́нь.
Без̾невѣ́стнаѧ дв҃о, ꙗ҆́же бг҃а без̾ сѣ́мени заче́ньши пло́тїю, мт҃и бг҃а вы́шнѧгѡ, твои́хъ ра́бъ мольбы̀ прїимѝ всенепоро́чнаѧ, всѣ́мъ подаю́щи ѡ҆чище́нїе прегрѣше́нїемъ. ны́нѣ на́ша моле́нїѧ прїе́мши, молѝ спасти́сѧ всѣ́мъ на́мъ.

боⷢ҇, коне́цъ ... и҆ спаси́ сп҃се на́шъ лю́ди согрѣ́шшїѧ.

Возва́хъ к̾ тебѣ̀ гдⷭ҇и, вонмѝ, приклони́ ми ᲂу҆́хо твоѐ вопїю́щꙋ, и҆ ѡ҆чи́сти пре́жде да́же нево́змеши менѐ ѿ сю́дꙋ. 

На́ гдⷭ҇а и҆мѣ́ѧ наде́ждꙋ, не ᲂу҆страши́тсѧ тогда̀, є҆гда̀ ѻ҆гне́мъ всѧ̀ сꙋди́ти и҆́мать и҆ мꙋ́кою. 

Ст҃ы́и дх҃ъ бг҃осло́вїѧ є҆ди́ница трист҃а́ѧ, ѻ҆ц҃ъ бо без̾нача́ленъ ѿ него́же роди́сѧ сн҃ъ без̾лѣ́тенъ, и҆ дх҃ъ сопрⷭ҇то́ленъ, со ѡ҆бра́зно ѿ ѻ҆ц҃а спросїѧ́ша.

Срⷣце моѐ, стра́хомъ твои́мъ да покры́етсѧ, смиренномꙋ́дрствꙋющи, да невозне́ссѧ ѿпаде́тъ ѿ тебѐ всеще́дре. 

Къ мт҃ри свое́й землѝ, ѿходѧ́и всѧ́къ, а҆́бїе разрѣша́етсѧ прїѧ́ти мꙋ́ки, и҆лѝ по́чести пожи́вшихъ. 

Ст҃ы́мъ дх҃омъ, всѧ́къ кто̀ бжⷭ҇твеннѣ ви́дитъ и҆ пред̾гл҃етъ, чꙋдодѣ́етъ вы́шнѧѧ, в̾ трїе́хъ є҆ди́нагѡ бг҃а поѧ̀. а҆́ще бо и҆ трисїѧ́нно, є҆ди́но нача́ло бжⷭ҇твенное.

Сѐ что̀ добро̀, и҆лѝ что̀ красно̀, но є҆́же жи́ти бра́тїе в̾ кꙋ́пѣ. ѡ҆ се́мъ бо гдⷭ҇ь ѡ҆бѣща̀ живо́тъ вѣ́чныи. 
Ри́зы є҆гѡ̀ и҆́же кри́ны се́льныѧ, ми́рови повелѣва́етъ ничи́мже пещи́сѧ. 
Ст҃ы́мъ дх҃омъ, є҆динови́дною вино́ю всѧ̀ содержа́и миропода́тельнѡ, бг҃ъ бо се́й є҆́сть, ѻ҆ц҃ꙋ́ же и҆ сн҃ꙋ є҆диносꙋ́щенъ, и҆ гдⷭ҇ь.

Воцр҃и́тсѧ гдⷭ҇ь во́ вѣки, бг҃ъ тво́й сїѡ́не в̾ ро́дъ и҆ ро́дъ.

Ст҃ъ гдⷭ҇ь бг҃ъ на́шъ.

Помѧнѝ на́съ хрⷭ҇тѐ сп҃се ми́ра, ꙗ҆́коже разбо́йника помѧнꙋ̀ на́ древѣ, и҆ сподо́би всѣ́хъ є҆ди́не ще́дре, нбⷭ҇номꙋ црⷭ҇твїю тѝ.

Бл҃же́ни чтⷭ҇їи срцⷣмъ, ꙗк҆ѡ тїи́ бг҃а ѹ҆зрѧтъ.
Дне́сь хрⷭ҇то́съ воскр҃съ ѿ́ гроба, всѣ́мъ вѣ́рнымъ подаѧ̀ нетлѣ́нїе, и҆ ра́дость ѡ҆бновѝ мѷрѡно́сицамъ воскрⷭ҇нїѧ твоегѡ̀ гдⷭ҇и.
Бл҃же́ни миротво́рцы, ꙗ҆кѡ ті́и сн҃ове бж҃їи нарекꙋ́тсѧ.
На́ древѣ пригво́ждьсѧ сп҃се на́шъ во́лею, дре́вомъ а҆да́ма ѿ клѧ́твы и҆зба́вилъ є҆сѝ, по́далъ є҆сѝ ꙗ҆́кѡ ще́дръ є҆́же по ѻ҆́бразꙋ, и҆ раѧ̀ вселе́нїе.
Бл҃же́ни и҆згна́ни пра́вды ра́ди, ꙗ҆кѡ тѣ́хъ є҆сть црⷭ҇тво нбⷭ҇ное.
Ꙗ҆́кѡ на́ нб҃си мно́жество а҆́нг҃лъ, та́кѡ и҆ на землѝ ро́ди чл҃честїи, всест҃о́е воскрⷭ҇нїе пра́зднꙋютъ, бл҃гости твоеѧ̀ гдⷭ҇и.
Бл҃же́ни є҆стѐ є҆гда̀ поно́сѧтъ ва́мъ, и҆ и҆зженꙋ́тъ вы̀, и҆ рекꙋ́тъ всѧ́къ ѕо́лъ гл҃ъ, на вы̀лжꙋ́ще менѐ ра́ди.
Воз̾дви́гни на́съ ѿ́ гроба грѣхо́внагѡ сп҃се, стрⷭ҇тьмѝ мно́гими ᲂу҆мерщве́нныѧ, и҆ воста́нїемъ сѝ разорѝ мꙋчи́тельство сме́ртное, ꙗ҆́кѡ чл҃колю́бецъ.
Ра́дꙋйтесѧ и҆ весели́тесѧ, ꙗ҆кѡ мзда̀ ва́ша мно́га на́ нб҃сѣхъ.
Слы́ши а҆да́ме, и҆ ра́дꙋисѧ со є҆́ввою, ꙗ҆́кѡ ѡ҆бнажи́выи пре́жде ѻ҆бою̀ вы̀, и҆ пре́лести ра́ди прїе́мъ ва́съ плѣ́нники крⷭ҇то́мъ хрⷭ҇то́вымъ ᲂу҆праздни́сѧ.
Сла́ва. Сла́ва ѻ҆ц҃ꙋ̀ и҆ сн҃ꙋ и҆ ст҃омꙋ дх҃ꙋ.
Без̾нача́льнаѧ трⷪ҇це, нераздѣ́льнаѧ сꙋщество́мъ, сопресто́льнаѧ є҆ди́нице, є҆диночестна́ѧ сла́вою, пренача́льное є҆стество̀ и҆ црⷭ҇тво, спасѝ вѣ́рою воспѣва́ющихъ тѧ.
И҆ ны́нѣ. И҆ нн҃ѣ и҆ прⷭ҇нѡ и҆ во́ вѣки вѣкѡ́м, а҆ми́нь.
Ра́дꙋисѧ ѿ на́съ ст҃а́ѧ бцⷣе. ра́дꙋисѧ ꙗ҆́же ра́дость ро́ждьшаѧ ми́рꙋ. ра́дꙋисѧ є҆ди́на застꙋ́пнице чл҃кѡмъ, и҆ спасе́нїе дш҃а́мъ на́шимъ.