Гласъ з҃

Вече́рнѧѧ-Vespers

Гдⷭ҇ь воцр҃и́сѧ, в̾ лѣ́потꙋсѧ ѡ҆блечѐ.
Воскрⷭ҇шемꙋ ѿ ме́ртвыхъ, и҆ просвѣти́вшемꙋ всѧ́ческаѧ, прїиди́те поклони́мсѧ*. ѿ а҆дова бо мꙋчи́тельства на́съ свободѝ, свои́мъ тридне́внымъ воскрⷭ҇нїемъ, живо́тъ на́мъ дарова̀ и҆ ве́лїю ми́лость.
И҆бо оу҆твердѝ вселе́ннꙋю, ꙗ҆же не подви́житсѧ.
Во а҆дъ соше́дъ хрⷭ҇тѐ, сме́рть плѣни́лъ є҆сѝ. и҆ тридне́вно воскр҃съ, на́съ совоскреси́лъ є҆сѝ зовꙋ́щїѧ. сла́ва воскрⷭ҇нїю твоемꙋ̀, є҆ди́не чл҃колю́бче.
До́мꙋ твоемꙋ̀ подоба́етъ, ст҃ы́ни гдⷭ҇и в̾ долготꙋ̀ дні́й.
Стра́шенъ ꙗ҆ви́лсѧ є҆сѝ гдⷭ҇и, во́ гробѣ лежа̀ ꙗ҆кѡ спѧ̀, воскр҃съ же тридне́внѡ ꙗ҆кѡ си́ленъ, а҆да́ма совоскр҃си́лъ є҆сѝ, сла́вѧща твоѐ всеси́льное воста́нїе, гдⷭ҇и чл҃колю́бче.
Сла́ва о҆ц҃у́ и҆ сн҃у и҆ ст҃о́мꙋ дх҃ꙋ, и҆ ны́нѣ и҆ при́снѡ и҆ во́ вѣ́ки вѣкѡмъ, а҆ми́нь.
Под̾ кро́въ тво́й влчⷣце, всѝ земноро́днїи прибѣгаю́ще вопїем́ъ тѝ, бцеⷣ оу҆пован́їе наш́е, и҆збав́и нас́ъ ѿ безм̾ѣ́рныхъ прегрѣше́нїи, и҆ спасѝ дш҃а на́ша.

Ѹ҆́тренѧ-Matins

Кано́нъ-Canon

Літꙋргїѧ-Liturgy

Бл҃же́ни чтⷭ҇їи срцⷣмъ, ꙗк҆ѡ тїи́ бг҃а ѹ҆зрѧтъ.
На крⷭ҇тъ воз̾несе́сѧ ще́дре, а҆да́мово рꙋкописа́нїе дре́внѧгѡ грѣха̀ ѡ҆чи́стилъ є҆сѝ, и҆ спа́слъ є҆сѝ ѿ́лести ро́дъ чл҃ческїи. тѣ́мже воспѣва́емъ тѧ бл҃года́телю гдⷭ҇и.
Бл҃же́ни миротво́рцы, ꙗ҆кѡ ті́и сн҃ове бж҃їи нарекꙋ́тсѧ.
Во́ гробѣ ꙗ҆кѡ сме́ртенъ положи́сѧ, животѐ всѧ́ческихъ хрⷭ҇тѐ, и҆ врата̀ а҆дова сокрꙋши́лъ є҆сѝ. и҆ воскр҃се во сла́вѣ тридне́внѡ ꙗ҆кѡ си́ленъ, и҆ всѣ́хъ просвѣти́лъ є҆сѝ, поклонѧ́ющихсѧ * твоемꙋ̀ воста́нїю.
Бл҃же́ни и҆згна́ни пра́вды ра́ди, ꙗ҆кѡ тѣ́хъ є҆сть црⷭ҇тво нбⷭ҇ное.
Совоздви́глъ є҆сѝ во свое́мъ воста́нїи а҆да́ма живода́вче хрⷭ҇тѐ, дре́внее нетлѣ́нїе да́рꙋѧ є҆же в̾ раѝ. тѣ́мже вопїю̀ с̾ разбо́йникомъ, помѧни́ мѧ сп҃се во црⷭ҇твїи сѝ.
Бл҃же́ни є҆стѐ є҆гда̀ поно́сѧтъ ва́мъ, и҆ и҆зженꙋ́тъ вы̀, и҆ рекꙋ́тъ всѧ́къ ѕо́лъ гл҃ъ, на вы̀лжꙋ́ще менѐ ра́ди.
Гдⷭ҇ь воскр҃съ тридне́вно и҆з̾ ме́ртвыхъ, дарова́лъ є҆сть ми́ръ свои́мъ оу҆ченикѡ́мъ, и҆ тѣ́хъ блгⷭ҇ви́въ посла́въ ре́къ, всѧ̀ приведи́те в̾ црⷭ҇твїе моѐ.
Ра́дꙋйтесѧ и҆ весели́тесѧ, ꙗ҆кѡ мзда̀ ва́ша мно́га на́ нб҃сѣхъ.
И҆злїѧ̀ ꙗ҆дъ ѕмі́й и҆ногда̀ в̾ слꙋ́хъ є҆ввинъ, хрⷭ҇то́съ в̾ стра́сти крⷭ҇тнѣй, и҆сточи́лъ є҆сть ми́рови наслажде́нїе. тѣ́мже взыва́емъ, помѧнѝ на́съ гдⷭ҇и во црⷭ҇твїи сѝ.
Сла́ва. Сла́ва ѻ҆ц҃ꙋ̀ и҆ сн҃ꙋ и҆ ст҃омꙋ дх҃ꙋ.
Свѣ́тъ ѻ҆ц҃ъ, свѣ́тъ сн҃ъ сло́во, свѣ́тъ дх҃ъ ст҃ы́и. но є҆ди́нъ свѣ́тъ трⷪ҇ца. є҆ди́нъ бо бг҃ъ в̾ трїе́хъ оу҆бѡ ли́цѣхъ, є҆ди́но же є҆стество̀ и҆ нача́ло, непресѣко́мо и҆ неслїѧ́нно, при́снѡ пребыва́ющее.
И҆ ны́нѣ. И҆ нн҃ѣ и҆ прⷭ҇нѡ и҆ во́ вѣки вѣкѡ́м, а҆ми́нь.
Родила̀ є҆сѝ бцⷣе пло́тїю сн҃а, сло́во бг҃а и҆ ѻ҆ц҃а, ꙗ҆кѡ вѣ́сть са́мъ є҆ди́нъ. тѣ́мже дв҃о мт҃и ѡ҆божи́вшїисѧ тебѐ ра́ди, ра́дꙋисѧ тебѣ̀ зове́мъ, хрⷭ҇тїа́нѡмъ оу҆пова́нїе.