Гласъ є҃

Вече́рнѧѧ-Vespers

И҆зведѝ и҆з̾ темни́цы дш҃ꙋ мою̀,* и҆сповѣ́датисѧ и҆́мени твоемꙋ̀.
Честны́мъ твои́мъ крⷭ҇то́мъ хрⷭ҇тѐ, дїа́вола посрами́лъ є҆сѝ, и҆ воскрⷭ҇нїемъ твои́мъ жа́ло грѣхо́вное притꙋпи́лъ є҆сѝ, и҆ спа́слъ є҆сѝ на́съ ѿ вра́тъ сме́ртныхъ, сла́вимъ тѧ є҆диноро́дныи.
Менѐ ждꙋ́тъ пра́ведницы,* до́ндеже возда́си мнѣ̀
Воскрⷭ҇нїе даѧ̀ ро́дꙋ чл҃ческомꙋ, ꙗ҆́кѡ ѻ҆вча̀ на заколе́нїе веде́сѧ. ᲂу҆страши́шасѧ сегѡ̀ кнѧ́зи а҆́дъстїи, и҆ взѧ́шасѧ врата̀ плаче́внаѧ. вни́де бо цр҃ь сла́вы хрⷭ҇то́съ, гл҃ѧ ᲂу҆́жникѡмъ и҆зыди́те, сꙋ́щїи во тмѣ̀ ѿкры́йтесѧ.
И҆з̾ глꙋбины̀ возва́хъ к̾ тебѣ̀ гдⷭ҇и,* гдⷭ҇и ᲂу҆слы́ши гла́съ мо́й.
Ве́лїе чꙋ́до, неви́димыхъ содѣ́тель, за чл҃колю́бїе пло́тїю пострада́въ, и҆ воскр҃се без̾сме́ртныи. прїиди́те ѻ҆те́чествїѧ ꙗ҆зы́къ, томꙋ̀ поклони́мсѧ. милосе́рдїемъ бо є҆гѡ̀ ѿ́ лести и҆зба́вльшесѧ, в̾ трїе́хъ соста́вѣхъ, є҆ди́наго бг҃а пѣ́ти навыко́хомъ.

Гдⷭ҇ь воцр҃и́сѧ,* в̾ лѣ́потꙋсѧ ѡ҆блечѐ.
Прободе́нымъ ти ре́бромъ живода́вче, ка́пли ѡ҆ставле́нїѧ всѣ́мъ и҆сточи́лъ є҆сѝ, жи́знь и҆ спасе́нїе. пло́тїю же сме́рть воспрїѧ́тъ, без̾сме́ртїе на́мъ дарова̀. в̾сели́вжесѧ во́ гробъ, на́съ свободи́лъ є҆сѝ, совоскр҃си́въ с̾собо́ю сла́внѡ ꙗ҆́кѡ бг҃ъ. сегѡ̀ ра́ди вопїе́мъ ти, чл҃колю́бче гдⷭ҇и сла́ва тебѣ̀.
И҆́бо ᲂу҆твердѝ вселе́ннꙋю,* ꙗ҆же не подви́житсѧ.
Стра́нно твоѐ распѧ́тїе є҆́сть, и҆ є҆́же во а҆́дъ съше́ствїе чл҃колю́бче. плѣни́въ бо є҆гѡ̀, и҆ дре́внїѧ ᲂу҆́жники совоскр҃си́лъ є҆сѝ с̾ собо́ю сла́внѡ ꙗ҆́кѡ бг҃ъ. ра́й ѿве́рзъ, наслади́тисѧ тогѡ̀ сподо́билъ є҆сѝ. тѣ́мже и҆ на́мъ сла́вѧщимъ тридне́вное твоѐ воста́нїе, да́рꙋй ѡ҆чище́нїе грѣхѡ́въ, раѧ̀ жи́телѧ сподоблѧ́ѧ, ꙗ҆́кѡ є҆ди́нъ млрⷭ҇дъ.
До́мꙋ твоемꙋ̀ подоба́етъ,* ст҃ы́ни гдⷭ҇и в̾ долготꙋ̀ дні́й.
И҆́же на́съ ра́ди пло́тїю стрⷭ҇ть прїе́мъ, и҆ тридне́вно и҆з̾ ме́ртвыхъ воскр҃съ, плотьскі́ѧ на́ша стрⷭ҇ти и҆сцѣлѝ, и҆ воста́ви ѿ согрѣше́нїи лю́тыхъ чл҃колю́бче, и҆ спасѝ на́съ.
Сла́ва о҆ц҃ꙋ́ и҆ сн҃ꙋ́ и҆ ст҃о́мꙋ дх҃ꙋ,* и҆ ны́нѣ и҆ при́снѡ и҆ во́ вѣ́ки вѣкѡмъ, а҆ми́нь .
Цр҃ковь и҆ врата́ є҆сѝ, пола́та и҆ прⷭ҇то́лъ цр҃е́въ дв҃о всечⷭ҇таѧ. є҆ю́же и҆зба́витель мо́й хрⷭ҇то́съ и҆ гдⷭ҇ь, и҆́же во тмѣ̀ сѣдѧ́щимъ ꙗ҆ви́сѧ сл҃нце сы́и пра́ведное, просвѣти́ти хотѧ̀, и҆́хже созда̀ по ѻ҆́бразꙋ своемꙋ̀ рꙋко́ю свое́ю. тѣ́мже всепѣ́таѧ, ꙗ҆́кѡ мт҃рьне дерзнове́нїе к̾ немꙋ̀ стѧжа́вши, непреста́ннѡ молѝ спасти́сѧ дш҃а́мъ на́шимъ.

Ѹ҆́тренѧ-Matins

Кано́нъ-Canon

Літꙋргїѧ-Liturgy

Бл҃же́ни чⷭ҇тїи срⷣцемъ,* ꙗ҆́кѡ ті́и бг҃а ᲂу҆́зрѧтъ.
И҆́же ѿ́ древа крⷭ҇тнагѡ живо́тъ процвѣ́тша ро́дꙋ на́шемꙋ, и҆ и҆з̾сꙋши́вша ꙗ҆́же ѿ́ древа клѧ́твꙋ, ꙗ҆́кѡ сп҃са и҆ содѣ́телѧ тогѡ̀ воспое́мъ.
Бл҃же́ни миротво́рцы,* ꙗ҆́кѡ ті́и сы́нове бж҃їи нарекꙋ́тсѧ.
Распе́ншꙋтисѧ хрⷭ҇тѐ, посредѣ̀ двою̀ ѡ҆сꙋжде́ною разбо́йникꙋ, є҆ди́нъ ᲂу҆́бѡ похꙋ́ливъ тѧ, ѡ҆сꙋжде́нъ бы́сть пра́веднѡ. дрꙋгі́и же тѧ̀ бг҃осло́вивъ, в̾ ра́й всели́сѧ.
Бл҃же́ни и҆з̾гна́ни пра́вды ра́ди,* ꙗ҆́кѡ тѣ́хъ є҆́сть црⷭ҇тво нбⷭ҇ное. Сме́ртїю твое́ю хрⷭ҇тѐ, сме́ртнꙋю разрꙋши́лъ є҆сѝ си́лꙋ. и҆ совоздви́глъ є҆сѝ ѿ́ вѣка ᲂу҆ме́ршихъ, тебѐ пою́щихъ и҆́стиннагѡ бг҃а и҆ сп҃са на́шегѡ.
Бл҃же́ни є҆стѐ є҆гда̀ поно́сѧтъ ва́мъ, и҆ и҆зженꙋ́т̾ вы̀, и҆ рекꙋ́тъ всѧ́къ ѕо́лъ гл҃ъ,* на вы̀ лжꙋ́ще менѐ ра́ди.
Всю̀ и҆спо́лни зе́млю, а҆пⷭ҇лъ твои́хъ вѣща́нїе хрⷭ҇тѐ, и҆ прогна̀ без̾бо́жїѧ но́щь, и҆ ѡ҆зарѝ всѧ̀ вѣ́рныѧ свѣ́томъ ра́зꙋма.
Ра́дꙋйтесѧ и҆ весели́тесѧ,* ꙗ҆́кѡ мзда̀ ва́ша мно́га на́ нб҃сѣхъ.
На́ гробъ тво́й хрⷭ҇тѐ, прише́дше жены̀ чⷭ҇тны́ѧ и҆ска́хꙋ тѧ жизнода́вче ми́ромъ пома́зати. и҆ ꙗ҆ви́сѧ и҆́мъ а҆́нг҃лъ вопїѧ̀, воскр҃се гдⷭ҇ь.
Сла́ва,* сла́ва ѻ҆ц҃ꙋ и҆ сн҃ꙋ и҆ ст҃о́мꙋ дх҃ꙋ
Покланѧ́емтисѧ трⷪ҇це, є҆ди́нице без̾нача́льнаѧ, и҆ равночⷭ҇тна́ѧ, и҆ прославлѧ́емъ тѧ̀ с̾ вы́шними си́лами. ст҃ъ є҆сѝ без̾нача́льныи бж҃е, трⷪ҇це взыва́юще.
И҆ ны́нѣ.* и҆ ны́нѣ и҆ прⷭ҇нѡ и҆ во́ вѣки вѣко́мъ, а҆ми́нь.
Наслѣ́довавше ра́дость, ржⷭ҇тва̀ твоегѡ̀ ра́ди пречⷭ҇таѧ, ра́дость ти вѣща́емъ со а҆́нг҃лѡмъ вопїю́ще, ра́дꙋисѧ мт҃и и҆́стиннагѡ бг҃а и҆ сп҃са на́шегѡ.