Гласъ г҃

Вече́рнѧѧ-Vespers

И҆зведѝ и҆з̾ темни́цы дш҃ꙋ мою̀, и҆сповѣ́датисѧ и҆́мени твоѐмꙋ.
Животворѧ́щемꙋ твоемꙋ̀ крⷭ҇тꙋ̀, непреста́ннѡ кла́нѧющесѧ хрⷭ҇тѐ, и҆ тридне́вное воскрⷭ҇нїе твоѐ сла́вимъ. тѣ́мъ бо ѡ҆бнови́лъ є҆сѝ, и҆стлѣ́вшеє чл҃ческое є҆стество̀ всеси́льне. и҆ є҆́же на небеса̀ восхо́дъ ѡ҆бнови́лъ є҆сѝ на́мъ, ꙗ҆́кѡ є҆ди́нъ бл҃гъ и҆ чл҃колю́бецъ.
Мене́ жды́тъ пра́ведницы, до́ндеже возда́си мнѣ̀
Дре́ва преслꙋша́нїѧ запреще́нїе, разрѣши́лъ є҆сѝ сп҃се, на́ древѣ крⷭ҇тнѣмъ во́лею пригво́ждьсѧ. и҆ во а́҆дъ соше́дъ си́льне, сме́ртыѧ ᲂу҆́зы ꙗ҆̀кѡ бг҃ъ растерза́лъ є҆сѝ. сегѡ̀ ра́ди кла́нѧемсѧ, є҆́же и҆з̾ ме́ртвыхъ твоемꙋ̀ воскрⷭ҇нїю, ра́достїю вопїю̀ще, всеси́льне гдⷭ҇и сла́ва тебѣ̀.
И҆з̾ глꙋбины̀ возва́хъ к̾ тебѣ̀ гдⷭ҇и, гдⷭ҇и ᲂу҆слы́ши гла́съ мо́й.
Врата̀ а҆́дова сокрꙋши́лъ є҆сѝ гдⷭ҇и, и҆ свое́ю сме́ртїю, сме́ртное црⷭ҇тво разрꙋши́лъ є҆сѝ. ро́дъ же чл҃ческїи и҆з̾ и҆стлѣ́нїѧ свобо́ждь, живо́тъ и҆ нетлѣ́нїе ми́рꙋ дарова̀, и҆ ве́лїю млⷭ҇ть.

Гдⷭ҇ь воцр҃и҆сѧ, * в̾ лѣ́потꙋсѧ ѡ҆блечѐ.
Повѣ́шенъ на́ древѣ є҆ди́не си́льне, всю̀ тва́рь поколѣба́лъ є҆сѝ, положи́вжесѧ во́ гробѣ, живꙋ́щїѧ во гробѣ́хъ воскр҃си́лъ є҆сѝ, нетлѣ́нїе и҆ жи́знь да́рꙋѧ чл҃ческомꙋ ро́дꙋ. тѣ́мже пою́ще сла́вимъ тридне́вное твоѐ воста́нїе.
И҆бо ᲂу҆твердѝ вселе́ннꙋю, * ꙗ҆же не подви́житсѧ.
Лю́дїє пребез̾зако́ннїи хрⷭ҇тѐ, тебѐ преда́вше пила́тꙋ, распѧ́ти ѡ҆сꙋди́ша, неразꙋ́мнїи ѡ҆ бл҃годѣѧ́нїи ꙗ҆́вльшесѧ. но во́лею претерпѣ́въ погребе́нїе самовла́стно, тридне́вно є҆сѝ воскр҃слъ ꙗ҆́кѡ бг҃ъ, да́рꙋѧ на́мъ без̾коне́чныи живо́тъ, и҆ ве́лїю млⷭ҇ть.
До́мꙋ твоѐмꙋ подоба́етъ, * ст҃ы́ни гдⷭ҇и в̾ долготꙋ̀ дні́й.
Со слеза́ми жены̀ доше́дше гро́ба, тебѐ и҆ска́хꙋ. не ѡ҆брѣ́тше же, рыда́юще с̾ пла́чемъ вопїѧ́хꙋ глаго́люще, ᲂу҆вы̀ на́мъ сп҃се на́шъ цр҃ю всѣ́хъ, ка́кѡ ᲂу҆кра́денъ бы́сть; ко́еже мѣ́сто держи́тъ, живоно́сное тѣ́ло твоѐ; а҆́нг҃лъ же к̾ ни́мъ ѿвѣща̀, непла́чите речѐ, но ше́дше проповѣ́дите, ꙗ҆́кѡ воскр҃се гдⷭ҇ь, подаѧ̀ на́мъ ра́дость, ꙗ҆́кѡ є҆ди́нъ милосе́рдъ.
Сла́ва о҆ц҃ꙋ́ и҆ сн҃ꙋ́ и҆ ст҃о́мꙋ дх҃ꙋ, * и҆ ны́нѣ и҆ при́снѡ и҆ во́ вѣ́ки вѣкѡмъ, а҆ми́нь .
Пода́ждь ᲂу҆тѣше́нїе, свои́мъ рабо́мъ всенепоро́чнаѧ, ᲂу҆толѧ́ющи лю́таѧ на ны̀ ѡ҆бстоѧ́нїѧ, всѧ́кїѧ ско́рби на́съ и҆з̾мѣнѧ́ющи. тѧ́ бо є҆ди́нꙋ тве́рдо и҆ и҆звѣ́стнѡ ѡ҆снова́нїе и҆́мамы, и҆ твоѐ застꙋпле́нїе стѧжа́хомъ, да непостыди́мсѧ влⷣчце, тебѐ призыва́юще. потщи́сѧ на моли́твꙋ тебѣ̀ вопїю́щихъ, ра́дꙋйсѧ влⷣчце всѣ́мъ помо́щнице, ра́досте и҆ покро́ве дш҃а́мъ на́шимъ.

Ѹ҆́тренѧ-Matins

Кано́нъ-Canon

Літꙋргїѧ-Liturgy

Бл҃же́ни чⷭ҇тїи срⷣцемъ,* ꙗ҆́кѡ ті́и бг҃а ᲂу҆́зрѧтъ.
Крⷭ҇тъ хрⷭ҇то́въ, въ помышле́нїи всѝ и҆мꙋ́ще, жите́йскїѧ сла́сти ᲂу҆мертви́ти всѝ потщи́мсѧ, цр҃ковь дꙋ́ши на́ши ст҃о́мꙋ дх҃ꙋ сотворѧ́юще. гла́съ разбо́йника бл҃гонра́внагѡ, вѣ́рнїи к̾ немꙋ̀ воз̾сыла́емъ, помѧнѝ и҆ на́съ сп҃се во црⷭ҇твїи сѝ.

Бл҃же́ни миротво́рцы,* ꙗ҆́кѡ ті́и сы́нове бж҃їи нарекꙋ́тсѧ.
Воскрⷭ҇шаго и҆з̾ ме́ртвыхъ, и҆ а҆́довꙋ держа́вꙋ плѣни́вшаго, и҆ ꙗ҆́вльшагосѧ жена́мъ мѷроно́сицамъ, и҆ ра́дꙋйтесѧ возопи́вшаго и҆́мъ, вѣ́рнїи ᲂу҆мо́лимъ ѿ и҆стлѣ́нїѧ и҆зба́вити чл҃чество. зовꙋ́ще всегда̀ к̾ немꙋ̀, разбо́йника бл҃горазꙋ́мнагѡ гла́сомъ, помѧнѝ и҆ на́съ во црⷭ҇твїи сѝ.

Бл҃же́ни и҆з̾гна́ни пра́вды ра́ди,* ꙗ҆́кѡ тѣ́хъ є҆́сть црⷭ҇тво нбⷭ҇ное. На́ гробъ тво́й хрⷭ҇тѐ, мѷроно́сицы прїидо́ша пома́зати тѧ̀, и҆ не ѡ҆брѣ́тше бл҃же, живоно́сное и҆ пречи́стое тѣ́ло твоѐ, недомышлѧ́хꙋсѧ, и҆ со слеза́ми рыда́юще, и҆ска́хꙋ тебѐ. ви́дѣвше же влⷣко тебѐ люби́маго, вопїѧ́хꙋ ти, помѧнѝ и҆ на́съ во црⷭ҇твїи сѝ.

Бл҃же́ни є҆стѐ є҆гда̀ поно́сѧтъ ва́мъ, и҆ и҆зженꙋ́т̾ вы̀, и҆ рекꙋ́тъ всѧ́къ ѕо́лъ гл҃ъ,* на вы̀ лжꙋ́ще менѐ ра́ди.
Вои́стинꙋ воскр҃се хрⷭ҇то́съ, и҆ свидѣ́те льствꙋетъ гро́бъ, к̾ ва́мъ законопрестꙋ́пницы. и҆́бо гро́бнаѧ своѧ̀ ѡ҆ста́вль, воскр҃се тридне́вно. ка́мень запечатлѣ́сѧ, и҆ пре́д̾ гробѡмъ стра́жїе пред̾стоѧ́хꙋ. а҆́дъ плѣни́сѧ, сме́рть ᲂу҆мертви́сѧ. не ᲂу҆кра́денъ бы́сть хрⷭ҇то́съ. вѣ́рꙋйте с̾ на́ми воскрⷭ҇нїю є҆гѡ̀.

Ра́дꙋйтесѧ и҆ весели́тесѧ,* ꙗ҆́кѡ мзда̀ ва́ша мно́га на́ нб҃сѣхъ.
Прише́дъ ко ᲂу҆ченикѡ́мъ, и҆ ми́ръ си́мъ да́рꙋѧ, и҆ невѣ́рꙋюща ѳѡмꙋ̀, ꙗ҆́звъ показа́нїемъ ᲂу҆вѣрѧ́ѧ, и҆ всѧ̀ концы̀ воз̾дви́глъ є҆сѝ гдⷭ҇и сла́вити тѧ. и҆ ны́нѣ ᲂу҆моле́нъ быва́ѧ, спаса́й влⷣко зовꙋ́щихъ, помѧнѝ на́съ во црⷭ҇твїи сѝ.

Сла́ва,* сла́ва ѻ҆ц҃ꙋ и҆ сн҃ꙋ и҆ ст҃о́мꙋ дх҃ꙋ
Ѻ҆ц҃а, и҆ сн҃а, и҆ дх҃а ст҃а́гѡ, всѝ є҆диномꙋ́дренѡ вѣ́рнїи славосло́вити досто́йнѡ помо́лимсѧ. є҆ди́нство бжⷭ҇тва̀, в̾ трїе́хъ сꙋ́ще соста́вѣхъ несмѣ́сно пребыва́ющеє, про́сто нераздѣ́льно и҆ неприкоснове́нно. и҆́мже и҆збавлѧ́емсѧ ѿ ѻ҆́гненагѡ мꙋче́нїѧ.

И҆ ны́нѣ.* и҆ ны́нѣ и҆ прⷭ҇нѡ и҆ во́ вѣки вѣко́мъ, а҆ми́нь.
Мт҃рь твою̀ хрⷭ҇тѐ, ю҆́же пло́тїю без̾ сѣ́мене ро́ждьшꙋю тѧ̀, и҆ дв҃ꙋю вои́стинꙋ и҆ по ржⷭ҇твѣ̀ пребы́вшꙋ нетлѣ́ннꙋ, сїю́ ти прино́симъ в̾ мл҃твꙋ, влⷣко многомлⷭ҇тиве, согрѣше́нїемъ проще́нїе дарова́ти, всегда̀ вопїю́щимъ вѣ́рнѡ. ра́дꙋисѧ ᲂу҆́бѡ вои́стинꙋ сокро́вище жи́зненое.