Воскрⷭ҇нїѧ дн҃ь, просвѣти́мсѧ лю́дїе, па́сха гдⷭ҇нѧ па́сха, ѿ сме́рти ᲂу҆́бѡ жи́зни, и҆ ѿ землѝ на́ нб҃о, хрⷭ҇то́съ бг҃ъ на́съ преве́лъ є҆́сть, побѣ́днꙋю пою́ща. 
Хрⷭ҇то́съ воскр҃се и҆з̾ ме́ртвыхъ. Ѡ҆чи́стимъ чꙋ́вствїѧ и҆ ᲂу҆́зримъ, непристꙋ́пнымъ свѣ́томъ, воскрⷭ҇нїѧ хрⷭ҇то́ва, блиста́ющесѧ и҆ ра́дꙋйтесѧ рекꙋ́ща, ꙗ҆́снѡ да ᲂу҆слы́шимъ, побѣ́днꙋю пою́ще.
Хрⷭ҇то́съ воскр҃се и҆з̾ ме́ртвыхъ. Небеса̀ ᲂу҆́бѡ досто́йнѡ да веселѧ́тсѧ, землѧ́ же да ра́дꙋетсѧ, да пра́зднꙋетъ же ми́ръ, ви́димыи же ве́сь и҆ неви́димыи, хрⷭ҇то́съ бо воста́лъ є҆́сть, весе́лїе вѣ́чное. 

Прїиди́те пи́во пїе́мъ но́во, не ѿ ка́мене непло́дна чꙋдодѣ́емо, но нетлѣ́нїѧ и҆сто́чника, и҆́з̾ гроба ѡ҆дожди́вша хрⷭ҇та̀, ѡ҆ не́мже ᲂу҆твержа́емсѧ. 
Хрⷭ҇то́съ воскр҃се и҆з̾ ме́ртвыхъ.
Нн҃ѣ всѧ̀ и҆спо́лнишасѧ свѣ́та, нб҃о же и҆ землѧ̀ и҆ преиспо́днѧѧ, да пра́зднꙋетъ же всѧ̀ тва́рь воста́нїе хрⷭ҇то́во, ѡ҆ не́мже ᲂу҆твержа́етсѧ. 
Хрⷭ҇то́съ воскр҃се и҆з̾ ме́ртвыхъ.
Вчера̀ сраспина́хтисѧ хрⷭ҇тѐ, вчера̀ спогребо́хтисѧ, и҆ совоста́ю дне́сь совоскре́сшꙋ ти, са́мъ мѧ просла́ви сп҃се, во ца́рствїи свое́мъ. 

На бж҃їи стра́жи, бг҃огл҃ивыи а҆вва́кꙋмъ да ста́нетъ съ на́ми, и҆ ꙗ҆ви́тъ свѣтоно́сна а҆́гг҃ла, велегла́снѡ гл҃юща, дне́сь спасе́нїе ми́рꙋ, ꙗ҆́кѡ воскр҃се хрⷭ҇то́съ, ꙗ҆́кѡ всеси́ленъ. 
Хрⷭ҇то́съ воскр҃се и҆з̾ ме́ртвыхъ.
Мꙋ́жескїи ᲂу҆́бѡ по́лъ, ꙗ҆́кѡ разве́рзе двⷭ҇твенꙋю ᲂу҆тро́бꙋ, бы́сть хрⷭ҇то́съ, ꙗ҆́кѡ чл҃къ же, а҆́гнецъ нарече́сѧ. непоро́ченъ же ꙗ҆́кѡ невкꙋсѝ скве́рны, на́ша ᲂу҆́бо па́сха, ꙗ҆́кѡ бг҃ъ и҆́стиненъ и҆ соверше́нъ ꙗ҆ви́сѧ. 
Хрⷭ҇то́съ воскр҃се и҆з̾ ме́ртвыхъ.
Ꙗ҆́кѡ є҆динолѣ́тенъ а҆́гнецъ, бл҃гослове́ныи на́мъ вѣне́цъ хрⷭ҇то́съ, во́лею за всѣ́хъ закла́нъ бы́сть. па́сха ѡ҆чи́стилище, и҆ а҆́бїе и҆́з̾ гроба краснѡ̀, пра́ведное на́мъ восїѧ̀ сл҃нце. 
Хрⷭ҇то́съ воскр҃се и҆з̾ ме́ртвыхъ.
Бг҃оѻ҆ц҃ъ ᲂу҆́бѡ дв҃дъ, пред̾ сѣ́ннымъ ковче́гомъ скака́ше и҆гра́ѧ. лю́дїе же бж҃їи ст҃і́и, ѻ҆́бразъ сбытїѐ зрѧ́ще, весели́мсѧ бжⷭ҇твенѣ, ꙗ҆́кѡ воскр҃се хрⷭ҇то́съ, ꙗ҆́кѡ всеси́ленъ.

Новосибирский женский хор - 2018

Оу҆́тренюемъ ᲂу҆́тренюю глꙋбокꙋ̀, и҆ вмѣ́стѡ ми́ра, пѣ́снь принесе́мъ влⷣцѣ, и҆ хрⷭ҇та̀ ᲂу҆́зримъ пра́ведное сл҃нце, всѣ́мъ жи́знь восїѧ́юща. 
Хрⷭ҇то́съ воскр҃се и҆з̾ ме́ртвыхъ.
Без̾чи́сленое твоѐ млрⷭ҇дїе, и҆́же а҆́довыми ᲂу҆́зами, содержи́ми зрѧ́ще, къ свѣ́тꙋ и҆дѧ́хꙋ хрⷭ҇тѐ, весе́лыми нога́ми, па́схꙋ хва́лѧще вѣ́чнꙋю. 
Хрⷭ҇то́съ воскр҃се и҆з̾ ме́ртвыхъ.
Пристꙋ́пимъ свѣтоно́снїи, и҆сходѧ́щꙋ хрⷭ҇тꙋ̀ и҆́з̾ гроба ꙗ҆́кѡ женихꙋ̀. и҆ спра́зднꙋемъ праздно любе́зными чи́нми, па́схꙋ бж҃їю спаси́тельнꙋю. 

Сни́де в̾ преиспо́днїѧ страны̀ землѝ, и҆ сокрꙋшѝ вереѝ вѣ́чныѧ преиспо́днїѧ свѧ́занныѧ хрⷭ҇тѐ, и҆ тридне́внѡ, ꙗ҆́кѡ ѿ ки́та і҆ѡ́на, воскр҃се ѿ́ гроба. 
Хрⷭ҇то́съ воскр҃се и҆з̾ ме́ртвыхъ.
Сохрани́въ цѣ́ла зна́менїѧ хрⷭ҇тѐ, воскр҃съ ѿ́ гроба, и҆́же ключа̀ дв҃ыѧ невреди́выи въ рожествѣ̀ свое́мъ, и҆ ѿве́рзлъ є҆сѝ на́мъ ра́йскїѧ две́ри. 
Хрⷭ҇то́съ воскр҃се и҆з̾ ме́ртвыхъ.
Сп҃се мо́й живо́е, а҆ не же́ртвеное заколе́нїе ꙗ҆́кѡ бг҃ъ, са́мъ себѐ во́лею приве́де ко ѻ҆ц҃ꙋ. совоскреси́ же всеро́дна а҆да́ма, воскр҃се ѿ́ гроба.

А҆́ще и҆ во́ гробъ сни́де без̾сме́ртне, но а҆́довꙋ разрꙋши́лъ є҆сѝ си́лꙋ, и҆ воскр҃се ꙗ҆́кѡ побѣди́тель хрⷭ҇тѐ бж҃е, жена́мъ мѷрѡно́сицамъ ра́дость провѣща́въ, и҆ свои́мъ а҆пⷭ҇лѡмъ ми́ръ дарова̀, и҆́же па́дшимъ подаѧ̀ воскрⷭ҇нїе. 

Ѻ҆́троки ѿ пе́щи и҆зба́вивъ, бы́въ ᲂу҆́бо чл҃къ, стра́жетъ ꙗ҆́ко сме́ртенъ. и҆ стра́стїю ᲂу҆мерщве́ною, в̾ нетлеѣ́нїе о҆блачи́тъ бл҃голѣ́пїе. е҆ди́нъ бл҃гослове́нъ ѿц҃е҆мъ бг҃ъ и҆ препросла́вленъ
Хрⷭ҇то́съ воскр҃се и҆з̾ ме́ртвыхъ.
Жены̀ с̾ ми́ромъ бг҃омꙋ́дрыѧ, вослѣ́дъ тебѐ теча́хꙋ. є҆го́же ꙗ҆́кѡ ме́ртва, со слеза́ми и҆ска́хꙋ, поклѡни́шасѧ ра́дꙋющесѧ живо́мꙋ бг҃ꙋ. и па́схꙋ та́йнꙋю, твои́мъ хрⷭ҇тѐ ᲂу҆ченикѡ́мъ бл҃говѣсти́ша.
Хрⷭ҇то́съ воскр҃се и҆з̾ ме́ртвыхъ.
Ꙗ҆́ко вои҆́стинꙋ сщ҃еннаѧ, и҆ всѐ пра́зднественаѧ, сїѧ̀ спаси́телнаѧ но́щь. свѣтоза́рнаѧ, и свѣтоно́снагѡ днѐ. воста́нїю сꙋ́щи проповѣ́дница. в̾ не́й же без̾лѣ́тныи свѣ́тъ, и҆́з̾ гроба пло́тьски всѣ́мъ воз̾сїѧ. 
Хрⷭ҇то́съ воскр҃се и҆з̾ ме́ртвыхъ.
Сме́рти пра́зднꙋемъ ᲂу҆мерщве́нїе, а҆́дово раⷥзрꙋше́нїе. и҆но́гѡ живота̀ вѣ́чнагѡ нача́ло. и҆ и҆гра́юще пое́мъ, виновнаго. є҆ди́нагѡ бл҃гослове́на, ѿц҃е́мъ бг҃а и҆ препросла́влена.

Се́й ᲂу҆́бѡ нарече́нныи ст҃ыи днь, є҆ди́нъ сꙋбѡ́тамъ, цр҃ь и҆ гдⷭ҇ь. пра́здникъ пра́здникомъ, и҆ торжество̀ є҆́сть торжество́мъ, во́ньже блгⷭ҇ви́мъ, хрⷭ҇та во́вѣки.
Хрⷭ҇то́съ воскр҃се и҆з̾ ме́ртвыхъ.
Прїи҆дѣ́те но́вагѡ виногра́да ча́да. бжⷭ҇твенагѡ весе́лїѧ, в̾ наро́читомъ дни воскр҃сенїѧ. цр҃ьствїѧ хрⷭ҇това прїо҆бщи́мсѧ, пою́ще є҆гѡ̀ ꙗ҆́кѡ бг҃а во́ вѣки.
Хрⷭ҇то́съ воскр҃се и҆з̾ ме́ртвыхъ. Воз̾веди ѻ҆́крестъ ѻ҆́чи твоѝ сїѡ́не и҆ ви́ждь. сѐбо прїидо́ша к̾ тебѣ̀, ꙗ҆́кѡ бг҃освѣ́тлаѧ свѣти́ла. ѿ за́пада и҆ сѣ́вера и҆ мо́рѧ, и҆ восто́ка ча́да твоѧ̀. к̾ тебѣ̀ бл҃госло́́вѧще хрⷭ҇та во́ вѣки.
Пресветаѧ торица бж҃е нашъ слава тебѣ.
Ѻ҆́ч҃е вседержи́телю и҆ сло́ве и҆ дꙋ́ше. тре́ми сое҆динѧ́емое, соста́ви є҆стество̀. пре́сꙋщественыи и҆ пребж҃е́ственыи. в̾ тѧ̀ крести́хомсѧ, и҆ тѧ̀ бл҃гослови́мъ, вовсѧ̀ вѣ́ки.

Свѣти́сѧ свѣти́сѧ, но́выи і҆є҆росали́ме сла́ва бо гн҃ѧ на тебѣ̀ воз̾сїѧ̀. ликꙋ́й нн҃ѣ и҆ весели́сѧ сїѡ́не. ты же чи́стаѧ кра́сꙋйсѧ бц҃е, ѡ҆ воста́нїи ржⷭ҇тва̀ твоегѡ̀. 
Хрⷭ҇то́съ воскр҃се и҆з̾ ме́ртвыхъ.
Ѽ бж҃ственагѡ, ѽ любе́знагѡ, ѽ сла́дкогѡ ти гла́са. с̾ на́ми бо нело́жно ѡ҆бѣща́лсѧ є҆сѝ бы́ти, до с̾конча́нїѧ вѣ́ка хрⷭ҇те. е҆го́же вѣ́рнїи держа́вꙋ и҆ наде́ждꙋ, и҆мꙋ́ще ра́дꙋемсѧ.
Хрⷭ҇то́съ воскр҃се и҆з̾ ме́ртвыхъ.
Ѽ па́сха вели́ка, и҆ сщ҃е́ннаѧ хрⷭ҇те. ѽ мꙋ́дрость сло́ве бж҃їе и҆ си́лꙋ. подава́й на́мъ и҆́стѣе тебѐ причаща́тисѧ. в̾ невече́рнѣмъ днѝ црⷭ҇твїѧ твоегѡ̀.

Пло́тїю ᲂу҆снꙋ́въ ꙗ҆́кѡ ме́ртвъ, цр҃ь и҆ гдⷭ҇ь, тридне́венъ воскр҃се, и҆ а҆да́ма воздви́гъ и҆з̾ тлѝ, и҆ ᲂу҆праздни́въ сме́рть. па́сха нетлѣ́нїѧ, ми́рꙋ спасе́нїе. 

Да воскрⷭ҇нетъ бг҃ъ,* и҆ разы́дꙋтсѧ вразѝ є҆гѡ̀.
Па́сха сщ҃е́ннаѧ на́мъ дне́сь показа́сѧ, па́сха но́ва ст҃а́ѧ, па́сха таи́нственнаѧ, па́сха всечестна́ѧ, па́сха хрⷭ҇та̀ и҆зба́вителѧ, па́сха непоро́чнаѧ, па́сха вели́каѧ, па́сха вѣ́рнымъ, па́сха двѣ́ри ра́йскїѧ на́мъ ѿверза́ющаѧ, па́сха всѣ́хъ ѡ҆сщ҃а́ющаѧ вѣ́рныхъ.
Ꙗ҆́кѡ и҆счеза́етъ ды́мъ,* да и҆сче́знꙋтъ.
Прїиди́те ѿ видѣ́нїѧ жены̀ бл҃говѣ́стницы, и҆ сїѡ́нꙋ рцы́те, прїимѝ ѿ на́съ ра́дость бл҃говѣ́щенїѧ воскрⷭ҇нїѧ хрⷭ҇то́ва, красꙋ́йсѧ и҆ ликꙋ́й, и҆ ра́дꙋисѧ і҆єрⷭ҇ли́ме, цр҃ѧ хрⷭ҇та̀ ᲂу҆́зрѣвъ и҆́з̾ гроба, ꙗ҆́кѡ жениха̀ и҆сходѧ́ща.
Та́кѡ да поги́бнꙋтъ грѣ́шницы ѿ лица̀ бж҃їѧ,* а҆ пра́ведницы да воз̾веселѧ́тсѧ. Мѷрѡно́сицы жены̀, ѕѣлѡ̀ ра́нѡ пред̾ста́ша гро́бꙋ живода́вца, и҆ ѡ҆брѣто́ша а҆́гг҃ла на ка́мени сѣдѧ́ща, и҆ то́й провѣща́въ и҆́мъ, си́це глаго́лаше, что̀ и҆́щете жива́гѡ с̾ ме́ртвыми; что̀ пла́чете нетлѣ́ннаго во тлѝ; ше́дше проповѣ́дите ᲂу҆ченикѡ́мъ є҆гѡ̀.
Се́й де́нь и҆́же сотворѝ гдⷭ҇ь,* воз̾ра́дꙋемсѧ и҆ воз̾весели́мсѧ во́нь.
Па́сха кра́сна, па́сха гдⷭ҇нѧ па́сха, па́сха всечестна́ѧ на́мъ воз̾сїѧ̀. па́сха, ра́достїю дрꙋ́гъ дрꙋ́га прїи́мемъ. Ѽ па́сха, и҆збавле́нїе ско́рби, и҆́бо и҆́з̾ гроба дне́сь, ꙗ҆́кѡ ѿ черто́га воз̾сїѧ̀ хрⷭ҇то́съ, жены̀ ра́дости и҆спо́лни глаго́лѧ, проповѣ́дите а҆пⷭ҇лѡмъ.
Сла́ва,* и҆ ны́нѣ.
Воскрⷭ҇нїѧ де́нь, просвѣти́мсѧ торжество́мъ, и҆ дрꙋ́гъ дрꙋ́га прїи́мемъ, и҆ рце́мъ бра́тїе, и҆ ненави́дѧщимъ на́съ, прости́мъ всѧ̀ воскрⷭ҇нїемъ, и҆ та́кѡ возопїе́мъ, хрⷭ҇то́съ воскре́се и҆з̾ ме́ртвыхъ, сме́ртїю сме́рть попра́въ, и҆ сꙋ́щимъ во гробѣ́хъ живо́тъ дарова̀.
Хрⷭ҇то́съ воскр҃се и҆з̾ме́ртвыхъ сме́ртїю на сме́рть настꙋпѝ, и҆ гро́бнымъ живо́тъ дарова̀, гⷤ.